امتحان كوميدى ساخر جدا

صحصح معايا يبنى انت وهي وبطلوا الهباب اللى بتطفحوه على الصبح ده [ندعوك للتسجيل في المنتدى أو التعريف بنفسك لمعاينة هذه الصورة]

السؤال الأول: التعبير
اكتب ما لا يقل عن 6500 سطر فى أحد الموضوعات التالية
لم يجد الطفل غير الشارع ملجأ نظرا لحالة البلد الهباب.. فاتجه إلى السرقة والقتل والحشيش.. حتى نال جزاءه وقبض عليه متلبسا بباكتة بانجو.. اكتب قصته مع تسليم الحِرز للباشا مراقب اللجنة
شهدت بلدنا الحبيبة نهضة في مجال التشييد والبناء وخصوصا بعد وصول سعر الحديد إلى 6500 جنيه للطن.. اكتب ما يمليه عليك ضميرك على أن يبدأ موضوعك بعبارة أنا باشتغل فى حديد عز
بعد انتشار ظاهرة أكل لحم الكلاب والحمير.. من وجهة نظرك كحمار تكلم عن هذه الظاهرة ومن المتسبب فيها بدون غلط.. الورق متراقب
ــــــــــــــــــــــــــــــــــــــــــــــ
السؤال الثانى : القصة
من قصة ‘ وعهد الله ما انت داخل الانتخابات’ .. اقرأ القطعة وأجب عن الآتى:
)ثم أتى إليه وضربه بالجزمة وقال : انت عايز تترشح فى الانتخابات يامعفن ؟؟ دانت عايز معجزة.. مش كفاية بتاكلوا لحمة ومستورين.. عايزين إيه تانى؟(
الأسئلة:
1
ما هى اللحمة؟ أو على الأقل حدد أقرب معنى خيالى لها
2
مرادف معجزة فى اللغة ( تغيير وزارى – زيادة المرتبات – رغيف العيش ) اختر يا مقلول البخت
3
لماذ ضربه الرجل بالجزمة وليس بالعصى مثلا؟؟
(أهو كسل .. لسة هيرفع العصاية؟ - عشان العصاية قلة قيمة برضه واحنا فى عصر الديمقراطية – عشان العصاية شغالة بس مش فى الضرب.. افهم انت بقى) اختر
4
حلل بمزيد من التفصيل جملة ضربه بالجزمة ومدى توافقها مع جملة مصر بتتقدم بينا
ــــــــــــــــــــــــــــــــــــــــــــــ
السؤال الثالث القراءة
من موضوع ( الزعيم .. والفنان .. والقدوة ) اقرأ القطعة وأجب
(وقد نفى الزعيم عادل إمام الإشاعات التى أكدت أنه مرشح لوزارة الثقافة.. وأكد أنه فنان فقط وليس سياسيا الخبر حقيقى كما أنه يرحب بالتوريث ومقتنع بكل سياسات الحكومة)
1-دخل كاتب هذه السطور مسرحية بودى جارد للزعيم رغم قرفه منه أساسا.. فى رأيك ما السبب فى دخوله؟
(أكيد معزوم – طبيعى معزوم – وربنا معزوم ).. اختر على أن تضع إيدك على المصحف وانت بتحلف للمراقب بتاع اللجنة
ــــــــــــــــــــــــــــــــــــــــــــــ
السؤال الرابع النصوص
أجب عن أحد النصين الآتيين
من نص ( ماشربتش من نيلها).. اقرأ ثم أجب
(ماشربتش من نيلها.. جربت تغنى لها.. جربت فى عز ماتحزن تمشى ف شوارعها وتشكى لها)
1
بعد رغبة صاحبة النص فى أن تلد ابنتها فى أمريكا لتحصل على الجنسية الأمريكية ..اختر ..ما المقصود بنيلها فى النص؟
(المسيسبى - الأمازون – يونج يانج)
2
هذا النص من نصوص الحزب الوطنى والدليل وجود اسم مهم من قيادات الحزب فى النص .استخرج الاسم. .وبوسه من بُقـُّه ورجَّعُه مكانه
3
أكمل الأبيات إلى آخر كحكة فى الكليب
4
قوبل النص بانتقادات بسبب بعده عن الواقع. .وضح من النص مايتفق مع القول المأثور اطبخى ياجارية .. كلف ياسيدى
ــــــــــــــــــــــــــــــــــــــــــــــ
من نص (حين ميسرة).. أجب عن الآتى
1
اذكر اسم مصيبة واحدة محصلتش فى النص الأسود ده
2
وضح عبقرية أحمد بدير الإرهابى فى النص وهو يكتب رسالة على الكمبيوتر باستخدام أزرار الأرقام فقط ومفيش حروف.. ويعطى أمر التنفيذ بزرار قايمة ستارت مش بإنتر .كمبيوتر إرهابى بقى
3
فى نصى ( ويجا وخيانة مشروعة ) وضح خالد يوسف هستيريا الجنس فى الطبقات الغنية.. وفى نص حين ميسرة وضح خالد يوسف هستيريا الجنس فى الطبقات الفقيرة.. عشان خطرى..
اذكر مع كامل البيانات أماكن هذه الهستيريا فى المعادى
4
سبب وجود الشرطة كل خمس دقائق فى النص
(موسم ترقيات عقبال أملتك ولازم شغل – أخو خالد يوسف ظابط ولازم يخدم أخوه – عشان الشرطة بتراقب قسم البوليس اللى جنب أحداث النص) اختر
ــــــــــــــــــــــــــــــــــــــــــــــ
السؤال الخامس النحو
أعرب ما تحته خط.. لو مالقيتش القطعة أصلا ..اتصرف
ذهب الرئيس إلى المؤتمر .. ضع الجملة السابقة فى صيغة المثنى .. ماعدا الرئيس طبعا يابني آدم
كان ممدوح إسماعيل قاتلا .. ضع إن مكان كان .. على ألا تنصب ممدوح.. عشان هوه بينصب لوحده
فُرِضت الضرائب علينا ببشاعة .. أعرب الجملة .. وارفع الضرائب أبوس إيدك
ــــــــــــــــــــــــــــــــــــــــــــــ
السؤال السادس الخط
كوز المحبة انخرم .. طرطش على كمى .. ياحبيبى بطل جفا وارحم عذاب امى
اكتب الجملة السابقة ثلاث مرات بثلاث خطوط .. موبينيل وفودافون واتصالات .. كما يمكن التحويل من خط لخط بنفس الرقم..
فقط اتصل بخدمة العملاء

انتهى الامتحان وعنكواا ما حليتوا أل يعنى فالحين اوى

[ندعوك للتسجيل في المنتدى أو التعريف بنفسك لمعاينة هذه الصورة] ههههههههههههههههههههههههههههه

موضوع فظيع جامد جدا جداااا اية الحلاوة دى ياباشا [ندعوك للتسجيل في المنتدى أو التعريف بنفسك لمعاينة هذه الصورة]

ويارب مننحرمش من مواضيعك الجامدة

ههههههههههههههههههه [ندعوك للتسجيل في المنتدى أو التعريف بنفسك لمعاينة هذه الصورة]

جامد يامان وربنا انت راجل زى العسل

ومظبطلك موضوع اهداء منى لك فى منتدى الفن ياريس [ندعوك للتسجيل في المنتدى أو التعريف بنفسك لمعاينة هذه الصورة]

تحياتى لك [ندعوك للتسجيل في المنتدى أو التعريف بنفسك لمعاينة هذه الصورة]

هههههههههههههههههه

حلو الموضوع اوى وحلو كمان تظبيط المواضيع والاهداءات دى

جامد ياباشا لا تحرمنا من مواضيعك تحياتى لكـــ [ندعوك للتسجيل في المنتدى أو التعريف بنفسك لمعاينة هذه الصورة]